Սիրելի բարեկամներ։

Այսօր, սկսելով Եսայիա մարգարեի գրքի ուսումնասիրությունը և օգտվելով «ԱՆՆԱ» մեթոդից, ստորև ներկայացնում եմ սերտողության արդյունքները և ակնկալում եմ Ձեր եռանդուն մասնակցությունը մեկնաբանությունների տեսքով։ Մեկնաբանություններ կարող են թողնել Համացանց եկեղեցու այն անդամները, ովքեր լրացուցիչ գրանցվել են նաև Register-ի միջոցով։

                                                                                                                                   Սիրով,                                                                                                                                 Պավել Սարգսյան,                                                                                                                    Համացանց եկեղեցու հովիվ

                                                              ԵՍԱՅԻԱ 1

1.  Իսրայելի օրինակը ցույց է տալիս, որ հավատացյալ, երկրպագության մասնակցող և բոլոր ծեսերը տեղը տեղին կատարող ժողովուրդը իրականում կարող է Աստծուն չճանաչել։ Պատճառը. «Անօրենություն և տոնախմբություն»։ Ելքը. դադարել անօրենություն գործել և սովորել բարություն գործել։ Վերջինս ենթադրում է սիրո փոխհարաբերություններ Աստծո և մարդկանց հետ։ Այս դեպքում կդադարեն անօրենության հետևանքները՝ անեծքները և կգան օրհնությունները։

2.  Այս սկզբունքի կիրառությունը արդիական է նաև այսօր։ Այս տեսակետից շատ քիչ բան է փոխվել։ «Անօրենություն և տոնախմբություն» - առկա է նաև այսօր։ Դա կարելի է նկատել նույնիսկ իրեն ճշմարիտ Աստծո եկեղեցի համարող անդամների կյանքում։ Օրհնությունների բացակայությունը մեղքի հետևանքն է։

3.  Ինձ պետք է հուզի այս հարցը. Արդյո՞ք իմ փոխհարաբերությունները Աստծո և մարդկանց հետ ճիշտ մակարդակի վրա են, թե՞ շտկելու և կարգավորելու բաներ կան։ Եսայիա 1-ին գլխի ֆիզիկական և իմաստային (խիազմ կառուցվածք) կենտրոնը 16-17 համարներն են. «Լվացվեցեք, մաքրվեցեք, հեռացրեք ձեր գործերի չարությունը իմ աչքերի առաջից, դադարեցեք չարություն գործելուց։ Սովորեցեք բարություն անել, որոնեցեք իրավունք, ուղղություն ցուցեք զրկվածին, որբի դատը տեսեք, որբևայրիի դատը պաշտպանեցեք»։